Cuentus n'asturianu - Larna, tsugar d’aventuras... ¡onde cualquier cousa puede pasar!

Cuentus alrededor de la tsariega

Larna, tsugar d’aventuras... ¡onde cualquier cousa puede pasar!

Voi a conta-vus lo que me pasou l’outru día...

Foi a la tseña a Tseireu, ya cuandu taba you aitsi ensemesmada cutsiendu unus garabutsus de rebotsu, tsevantei la cabeza ya vi un tsobu merando pa mí, arregañandu lus culmietsus ya cumu diciendu... ¡voi a cume-te!. You asusteimi muitu ya echei a currer monte abaixu, peru entrangaceime cu-nun gamachu ya baixei dando zarapicas hasta’l camín, ya si nun tsegu a trupezar cu-nuna pidricona que taba’l tsau baixu’l camín, mianicas si nun baixu rudandu pur aquel ribau hasta’l ríu.

M. P.

Créditos: David de Marión
Rescatado de la web larna.es

Cuentus n'asturianu - La ugüecha, el curdeiru ya'l tsobu

Cuentus alrededor de la tsariega

La ugüecha, el curdeiru ya'l tsobu

Nas curradas de la ilesia taban paciendu una ugüecha ya un curdeirín. Faía muitu fríu yal curdeiru berraba, berraba. Ya cunas suas berridas dicía-tse a la sua madre:

- Mama, vamus pa casa, que va venire’l tsobu ya va cumé-nus.

Ya contestaba la ugüecha:

- Pacica, pacica, que mañena nevará.

Ya decía el curdeirín:

- Mama, vamus pa casa, que va venire’l tsobu ya va cumé-nus.

Ya contestaba la ugüecha:

- Pacica, pacica, que mañena nevará.

Nestu venu un tsubón pula Curradona, saltóu la paré, achegóu de dous saltos onde etsus ya dixu arregañandu lus culmietsus:

- Voy a cumé-vus agora mesmu.

La ugüecha quedóu asustada, peru cumu buena fema acurdóu-se-tse una cousa pa entretenere al tsobu:

- Amira, tsubín, nos tamus aiquí güei, peru mañena va matá-nus a lus dous el nuesu amu purque ía la boda d’una ficha. Per amira, you quieru cumere unas yerbinas que tan nun tsendón, pus dicin que si se comen antias de murrere nun se siente la muerte. Ya you, de verdá, dá-me muita grima pensare que me afuegues ya que me manques muitu. En lo que you comu las yerbinas del tsendón baxa hasta’l ríu, reza un padrenuestru, subes apriesa ya después ya puedes cumé-nus y’afogá-nus.

Aquel tsobu, aunque dicin que tous son malus, tinía el curazón blandín, ya fixu lu que tse mandara la agüecha. Etsa yal curdeiru salienun pul cancietsu ya fonun pa casa patinas que te quieru. Cuandu el tsobu vulvíu del ríu díu-se cuenta de l’engañu ya foi curriendu a la corte de lass ugüechas. Nun pudu entrare purque etsas puxeran una palancona pur dentru.

El tsobu cavilóu un poucu y dixu con voz muitu cariñosa:

- ¡Salí a mexar!, ¡salí a mexar!

Ya contestaba la ugüecha:

- ¡Non, non, mexamos en casa! ¡Mexamos en casa!

Ya decía el tsobu:

- ¡Salí a cusere! ¡Salí a cusere!

Ya decía etsa:

- ¡Non, non, cusemus en casa! ¡Cusemus en casa!

Ya decía el tsobu:

- ¡Salí a enfilare l’agucha! ¡Salí a enfilare l’agucha!

Ya contestaba la ugüecha:

- ¡Non, non, enfilámus-la en casa! ¡Enfilámus-la en casa!

Viendu que nun salían ya rabiáu pul engañu, dixu el tsobu:

- A magar soi tsobu cerval, nunca me pasóu outru tal.

Ya contestóu-tse la ugüecha pur debaxu la puerta:

- ¡A magar soi ugüecha berradera, nunca tsevéi tal curridera!

Jotaele

Créditos: David de Marión
Rescatado de la web larna.es

Cuentus n'asturianu - La rapiega ya la denuncietsa

Cuentus alrededor de la tsariega

La rapiega ya la denuncietsa

Andaba una vez una rapiega azacanada pul monte buscandu a las suas crías. Hubiera-las dexáu pula mañanina templanu nuna cuevina ya cuandu vulvíu cuna cumida pa etsas nun las atupóu.

Andaba pur aitsí una denuncietsa cumiendu unas ablanas ya perguntóu-tse la rapiega:

- Aio, chacha, ¿visti lus mieus piquininus pur aiquí? ¡Probe de mí si perdí a esas prendinas tan guapas! ¡Mieus roxus! ¿Qué será d’etsus?

La denuncietsa cuntestóu-tse:

- ¿Lus tous fichus son unus animalucus feyus, peludus, rines, que va poucu andaban pur aiquí xugandu? Nun se perdienun, non. Tan n’ese escubal.

Dixu entós la rapiega:

- !Xustrona, fandanga, zalampernu, cunque animalucus feyus ya peludus, eh¡ ¡Bien se vei que nun lus pariste tú!

Jotaele

Créditos: David de Marión
Rescatado de la web larna.es

Cuentus n'asturianu - La gocha ya lus siete guchinus

Cuentus alrededor de la tsariega

La gocha ya lus siete guchinus

Van muitus anus, lus gochus pasaban cuasi tou’l día nu campu la Cuérguila. La xente tsevába-lus pula mañena ya pula tarde cada unu reuchía el dél. A lus guchinus prestábatses muitu tar pur aitsí, purque onde’l calichón taba mui tsagunosu ya había un buen tsugare pa fuzare na tsueza ya revulcá-se.

El tíu Carape mandaba tous lus días la sua gocha que tinía siete guchinus. Peru un día que marchóu pal ríu Pedrosu pur un carráu de tseña tardóu muitu ya nun chegóu a buscare la gocha ya lus siete guchinus antis d’escurecere.

El tíu Carape nun acababa de chegar ya yera ya nueite piechu. Ya cuandu la gocha quixu dá-se cuenta tinía delantre un tsubazu arregañándu lus culmietsus ya metiéndu-tse miedu a etsa ya’lus guchinus. Entre lus gochus yal tsobu había una presa que cruzaba la Cuérguila ya diba a dar a un mulín.

Ya dixu la gocha:

- Tsobu, asperaba pur ti, pa que me pasaras lus guchinus. Si nun me los pasas póngo.me a gruñire ya vien el mieu amu ya máta-te. Peru si m’ayudas a pasálus, doíte pa ti el furón.

El tsobu tous creyemos que ía malu, ya malu ía. Peru cualesquiera que seya algu listu puede engañá-lu.

Asina, foi el tsobu pasando unu pur unu lus guchinus. Pero cuandu acabóu díu-tse la gocha una fucicada ya teróu-lu pa la presa. L’augua la presa tinía muita fuercia ya tsevóu al tsobu p’abaxu hasta’l mulín. Tutal, que chegóu a la canal, que ía un tueru buecu muitu emplunu ya d’aitsí cayíu al rudenu, que ía una rueda de madera muitu grandona que da vueltas al caere l’augua.

El tsobu nun pudía salire d’aitsí ya dicía:

- Para bitsarón, para bitsarón”.

Ya cuntestába-tse’l rudenu:

- Para tú, que you non, para tú que you non.

Cuando vienu el tíu Calistu pula mañana alcuntróy el mulín paráu. Quixu puné-lu outra vez a dar vueltas peru nun pudu. Baxóu amiróu el rudeznu ya víu aitsí al tsobu afugáu. Sacóu-lu, quitóu-tse’l pitseichu pa faere abarcas ya teróu’lu pal ríu.

La mucher del tíu Carape vienu a buscare a la gocha ya lus guchinus ya cuandu xubían el calichón arriba cuntóu-tse etsa a la sua ama tou lu que tse hubiera pasáu.

Jotaele

Créditos: David de Marión
Rescatado de la web larna.es

Cuentus n'asturianu - El xatu ya'l tsobu

Cuentus alrededor de la tsariega

El xatu ya'l tsobu

Taba un xatu paciendu na currada del Caleichu. Yera un xatu guapu ya bien feitu, paicía ya un magüetín. Cuidában-lu muitu purque quirían que fora toru. Pur esu lu tenían na currada bien mantenidu. Cumu taba solu, pa que nun marchara atánuntse nu pescuezu una soga de serdas, una d’aquetsas que vinían a faere al tsugar unus homes d’outrus sitius. (L’home que faía las sogas chamába-se “sugueru” yal rapaz que tse daba a la cuerda chamába-se “murgueiru”. Dicía la mía bulica que lus rapaces al salir de la escuela dicían-tse pa faétse rabiar: “Dá-tse a la rueda murgueiru”. Yal nenu nun dicía nada, peru lus guajes cuntestaban pur èl: “Dá-tse tú que you nun quieru”).

Buenu, pus una d’esas sogas yera la que tinía al xatu amarráu pul pescuezu a la castañal.

Achegóu pur aitsí un tsobu viechu ya muertu fame, arimóuse al xatu ya dixu-tse:

- Voi a cumé-te agora mesmu.

El xatu dixu que sí, que ya tinía ganas de murrer, que nun había cousa más triste que tar toul’l día atáu a la castañal.

- Amira tsubín -dicía el xatu- desata la soga, átala al tou pescuezu ya verás que nun hai vida piora que la mía. Ata-te bien, fai dous u tres noyus bien apretaus ya desque me faigas un ratadín cumpañía cómes-me y’acabó-se.

El tsobu fixu lu que’l magüetín tse mandara. Ya desque víu el xatu que’l tsobu taba bien atáu a la outra punta la soga, pechóu a currere, saltóu el purteiru ya tsevóu al tsobu cuasi a rastras, purque aunque curría cuantu pudía, yera ya mui viechu ya nun yera a seguire al xatu.

Acheganun a las primeras casas del tsugare. Yal vé-las dicía el tsobu a voces:

- Si la soga nun parte u nun me desatu, apararéi na casa de l’amu’l xatu.

Jotaele